ಇರಾನ್‌ಗೆ ರಷ್ಯಾದಿಂದ ಸಹಾಯದ ಭರವಸೆ; ರಷ್ಯಾ ಎಂಟ್ರಿ ಕೊಡುತ್ತಾ..?
ತೆಹ್ರಾನ್‌/ಮಾಸ್ಕೊ: ಇರಾನ್‌ನ ಮೂರು ಅಣು ನೆಲೆಗಳ ಮೇಲೆ ಅಮೆರಿಕ ವಾಯುಪಡೆ ಬಿ-2 ಸ್ಪಿರಿಟ್‌ ಸ್ಟೆಲ್ತ್‌ ಬಾಂಬರ್‌ ಫೈಟರ್‌ಜೆಟ್‌ ಮೂಲಕ ಬಿ2ಬಾಂಬರ್‌ ಬಳಸಿ ದಾಳಿ ನಡೆಸಿದ ಮರುದಿನವೇ ರಷ್ಯಾ, ತನ್ನ ಮಿತ್ರ ದೇಶ ಇರಾನ್‌ಗೆ ಬಹಿರಂಗವಾಗಿ ಬೆಂಬಲ ಘೋಷಿಸಿದೆ.
ಅಮೆರಿಕ ದಾಳಿ ಬಳಿಕ ರಷ್ಯಾ ಪ್ರವಾಸ ಕೈಗೊಂಡಿರುವ ಇರಾನ್‌ ವಿದೇಶಾಂಗ ಸಚಿವ ಅಬ್ಬಾಸ್‌ ಅರ ಅವರು ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಿದರು. ಅತ್ತ ಉಕ್ರೇನ್‌ ಜತೆ ಸಮರ ಮುಂದುವರಿಸಿದ್ದರೂ ರಷ್ಯಾ, ಇರಾನ್‌ಗೆ ನೆರವಿನ ಭರವಸೆ ನೀಡಿದೆ. ಇರಾನ್‌ನ ಅಗತ್ಯಗಳಿಗೆ ತಕ್ಕಂತೆ ನೆರವು ನೀಡಲು ರಷ್ಯಾ ಸಿದ್ಧವಿದೆ ಎಂದು ಪುಟಿನ್‌ ಭರವಸೆ ನೀಡಿದ್ದಾರೆ.
ಪುಟಿನ್‌ ಜತೆಗಿನ ಮಾತುಕತೆ ವೇಳೆ ಇರಾನ್‌ ವಿದೇಶಾಂಗ ಸಚಿವ ಅಬ್ಬಾಸ್‌ ಅರ, ‘‘ಇಸ್ರೇಲ್‌ ಮತ್ತು ಅಮೆರಿಕದ ಆಕ್ರಮಣಕಾರಿ ನೀತಿ ಅಂತಾರಾಷ್ಟ್ರೀಯ ನಿಮಯಗಳಿಗೆ ವಿರುದ್ಧವಾಗಿದೆ. ಇರಾನ್‌ ಸಾರ್ವಭೌಮತ್ವ ರಕ್ಷಿಸಿಕೊಳ್ಳಲು ನಡೆಸುತ್ತಿರುವ ಹೋರಾಟ ಕಾನೂನು ಬದ್ಧವಾಗಿದೆ,’’ ಎಂದು ಪ್ರತಿಪಾದಿಸಿದರು. ಇದಕ್ಕೆ ಸಹಮತ ಸೂಚಿಸಿದ ಪುಟಿನ್‌, ‘‘ಇರಾನ್‌ ಮೇಲಿನ ದಾಳಿಗೆ ಟ್ರಂಪ್‌ ಆಡಳಿತ ಯಾವುದೇ ಸಮರ್ಥನೆ ನೀಡಲು ಸಾಧ್ಯವಿಲ್ಲ. ಅಪ್ರಚೋದಿತ ದಾಳಿಯನ್ನು ಯಾವ ದೇಶವೂ ಸಹಿಸಿಕೊಳ್ಳುವುದಿಲ್ಲ. ದೀರ್ಘಕಾಲದಿಂದ ಸಂಬಂಧ ಹೊಂದಿರುವ ಇರಾನ್‌ಗೆ ರಷ್ಯಾ ಸಹಾಯ ಮಾಡಲಿದೆ,’’ ಎಂದು ಪುಟಿನ್‌ ಭರವಸೆ ನೀಡಿದರು ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಖಮೇನಿ ಪತ್ರ:
ಅಬ್ಬಾಸ್‌ ಅರ ಅವರ ರಷ್ಯಾ ಭೇಟಿ ವೇಳೆ ತಮ್ಮ ರಾಷ್ಟ್ರಕ್ಕೆ ನೆರವು ನೀಡುವಂತೆ ಕೋರಿ ಇರಾನ್‌ ಪರಮೋಚ್ಛ ನಾಯಕ ಅಯತೊಲ್ಲಾಅಲಿ ಖಮೇನಿ ಬರೆದಿರುವ ಪತ್ರವನ್ನು ಪುಟಿನ್‌ ಅವರಿಗೆ ನೀಡಿದ್ದಾರೆಂದೂ ಸರಕಾರಿ ಸ್ವಾಮ್ಯದ ಟಿಎಸ್‌ಎಸ್‌ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಇರಾನ್‌ 6 ವಾಯುನೆಲೆಗೆ ದಾಳಿ
ಅಮೆರಿಕದ ‘ಆಪರೇಷನ್‌ ಮಿಡ್‌ನೈಟ್‌ ಹ್ಯಾಮರ್‌’ ಕಾರ್ಯಾಚರಣೆ ಬೆನ್ನಲ್ಲೇ ಇಸ್ರೇಲ್‌ ರಕ್ಷಣಾ ಪಡೆ (ಐಡಿಎಫ್‌) ಇರಾನ್‌ನ ತೆಹ್ರಾನ್‌ ಹೊರವಲಯದ ಫೋರ್ಡೊ ಅಣು ನೆಲೆ ಹಾಗೂ ಕುಖ್ಯಾತ ಎವಿನ್‌ ಕಾರಾಗೃಹವನ್ನು ಗುರಿಯಾಗಿಸಿಕೊಂಡು ಸೋಮವಾರ ದಾಳಿ ನಡೆಸಿದೆ. ಈ ಕಾರಾಗೃಹದಲ್ಲಿ ರಾಜಕೀಯ ಕೈದಿಗಳನ್ನು ಬಂಧಿಸಿಡಲಾಗಿತ್ತು. ಇದು ಇರಾನ್‌ಗೆ ಮತ್ತೆ ದೊಡ್ಡ ಆಘಾತ ನೀಡಿದಂತಾಗಿದೆ. ಫೋರ್ಡೊ ಅಣು ನೆಲೆ ಮಾತ್ರವಲ್ಲದೇ 6 ವಾಯುನೆಲೆ ಮೇಲೆ ಇಸ್ರೇಲ್‌ ಕ್ಷಿಪಣಿ ಮತ್ತು ಡ್ರೋನ್‌ ದಾಳಿ ನಡೆಸಲಾಗಿದೆ. 15 ಫೈಟರ್‌ ಜೆಟ್‌ ಹಾಗೂ ಒಂದು ಹೆಲಿಕಾಪ್ಟರ್‌ ಧ್ವಂಸಗೊಳಿಸಲಾಗಿದೆ ಎಂದು ಇಸ್ರೇಲ್‌ ಸೇನೆ ಹೇಳಿಕೊಂಡಿದೆ.
ಇರಾನ್‌ನಿಂದ ಜೆರುಸಲೇಂ ಟಾರ್ಗೆಟ್‌
ಇರಾನ್‌ ಸೇನೆಯು 15 ಖಂಡಾಂತರ ಕ್ಷಿಪಣಿಗಳ ಮೂಲಕ ಇಸ್ರೇಲ್‌ನ ಟೆಲ್‌ ಅವೀವ್‌, ಜೆರುಸಲೇಂನಲ್ಲಿ ವಿದ್ಯುತ್‌ ಮೂಲಸೌಕರ್ಯವನ್ನು ಗುರಿಯಾಗಿಸಿ ದಾಳಿ ನಡೆಸಿದೆ. ಜೆರುಸಲೇಂನಲ್ಲಿ ವಿದ್ಯುತ್‌ ಪೂರೈಕೆಯಲ್ಲಿ ವ್ಯತ್ಯಯವಾಗಿದೆ. ಸಿರಿಯಾದಲ್ಲಿರುವ ಅಮೆರಿಕ ವಾಯುನೆಲೆ ಮೇಲೂ ದಾಳಿ ನಡೆಸಿರುವುದು ವರದಿಯಾಗಿದೆ.
ಇರಾನ್‌ ಜತೆಗಿನ ಸಂಘರ್ಷದಲ್ಲಿ ಮಧ್ಯಪ್ರಾಚ್ಯದ ಹೊರಗಿನ ಶಕ್ತಿಗಳ ಪಾಲ್ಗೊಳ್ಳುವಿಕೆಯು ಜಗತ್ತನ್ನು ದೊಡ್ಡ ಅಪಾಯದತ್ತ ಕೊಂಡೊಯ್ಯುತ್ತಿದೆ ಎಂದಿದ್ದಾರೆ ವ್ಲಾದಿಮಿರ್‌ ಪುಟಿನ್‌, ರಷ್ಯಾ ಅಧ್ಯಕ್ಷ
ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಒಬ್ಬ ಜೂಜುಕೋರ. ನಮ್ಮ ರಾಷ್ಟ್ರದ ಅಣು ನೆಲೆಗಳ ಮೇಲಿನ ದಾಳಿಗೆ ಪ್ರತೀಕಾರ ತೀರಿಸಿಕೊಳ್ಳುವುದೇ ವಿರಮಿಸುವುದಿಲ್ಲ. ನಮ್ಮಿಂದಲೇ ಯುದ್ಧ ಅಂತ್ಯಗೊಳಿಸುತ್ತೇವೆ ಎಂದಿದ್ದಾರೆ ಎಬ್ರಾಹಿಂ ಝೋಲ್ಫಾಕರಿ ಇರಾನ್‌ ಸೆಂಟ್ರಲ್‌ ಮಿಲಿಟರಿ ಕಮಾಂಡ್‌ ವಕ್ತಾರ