ಬಾಗಲಕೋಟೆಯ ತನ್ನ ಮನೆಯಲ್ಲಿ ಕಳ್ಳತನ ನಡೆಯುವುದನ್ನು ಅಮೇರಿಕದಲ್ಲಿ ಕೂತು ತಪ್ಪಿಸಿದ ಯುವತಿ!
ಬಾಗಲಕೋಟೆ: ಮನೆಯೊಳಗೆ 'ಚಡ್ಡಿಗ್ಯಾಂಗ್' ಕಳ್ಳರ ಗುಂಪು ನುಗ್ಗುವುದನ್ನು ಇಲ್ಲೊಬ್ಬ ಯುವತಿ ಅಮೆರಿಕದಲ್ಲಿ ಕುಳಿತು ಬಾಗಲಕೋಟೆಯ ತನ್ನ ಮನೆಯಲ್ಲಾಗುತ್ತಿದ್ದ ಕಳ್ಳತನವನ್ನು ತಪ್ಪಿಸಿದ್ದಾರೆ.
ಬಾಗಲಕೋಟೆಯ ಮುಧೋಳದಲ್ಲಿ ನಿವೃತ್ತ ಪಿಡಬ್ಲ್ಯುಡಿ ಇಂಜಿನಿಯರ್ ಮತ್ತವರ ಪತ್ನಿ ಮಾತ್ರವಿದ್ದ ಮನೆಯನ್ನು ಗುರಿಯಾಗಿಸಿದ್ದ ಚಡ್ಡಿ ಗ್ಯಾಂಗ್ ರಾತ್ರೋರಾತ್ರಿ ಅವರ ಮನೆಗೆ ದಾಳಿ ಮಾಡಿ ಕಳ್ಳತನ ಮಾಡಲು ಬಂದಿದ್ದರು. ಅಮೆರಿಕದಲ್ಲಿದ್ದ ವೃದ್ಧ ದಂಪತಿ ಮಗಳು ಮೊಬೈಲ್ನಲ್ಲೇ ಇರುವ ಸಿಸಿಟಿವಿ ಆಕ್ಸಸ್ ಪಡೆದುಕೊಂಡಿದ್ದಾರೆ. ಆ ಮೂಲಕ ಕಳ್ಳತನವಾಗುವುದನ್ನು ಕ್ಷಣಾರ್ಧದಲ್ಲಿ ಪಾರು ಮಾಡಿರುವುದು ಎಲ್ಲರಿಗೂ ಅಚ್ಚರಿಯನ್ನುಂಟು ಮಾಡಿದೆ.
ಸಾಮಾನ್ಯವಾಗಿ ಸಿಸಿಟಿವಿ ದರೋಡೆ ಸೇರಿದಂತೆ ಎಲ್ಲ ಅಪರಾಧಗಳನ್ನು ಪತ್ತೆ ಹಚ್ಚಲು ಸಹಾಯ ಮಾಡುತ್ತವೆ. ಸಿಸಿಟಿವಿ ಇದೆ ಎನ್ನುವ ಕಾರಣಕ್ಕೆ ಕಳ್ಳತನ ಆಗೋದು ಕಡಿಮೆ ಇದೆ. ಜೊತೆಗೆ ಅದಕ್ಕೂ ಹೆದರದೆ ದರೋಡೆ ಮಾಡೋದು ಇದೆ. ಸದ್ಯ ತಂತ್ರಜ್ಞಾನ ಮುಂದುವರೆದಿರುವ ಕಾರಣ, ಮೊಬೈಲ್ನಲ್ಲೇ ಎಲ್ಲಾದರೂ ಕುಳಿತು ತಮ್ಮ ಮನೆ ಬಳಿಯಾಗುವ ಆಗುಹೋಗುಗಳನ್ನು ವೀಕ್ಷಿಸಬಹುದಾಗಿದೆ.
ಆಗಸ್ಟ್ 27 ರಂದು ಚಡ್ಡಿ ಕಳ್ಳರ ಗ್ಯಾಂಗ್ ಬಾಗಲಕೋಟೆಯ ಮುಧೋಳ ನಗರದ ಸಿದ್ದರಾಮೇಶ್ವರದಲ್ಲಿರುವ ನಿವೃತ್ತ ಇಂಜಿನಿಯರ್ ಹನುಮಂತಗೌಡ ಸಂಕಪ್ಪನವರ್ ಅವರ ಮನೆಗೆ ದರೋಡೆ ಮಾಡಲು ಮಧ್ಯರಾತ್ರಿ 1ಗಂಟೆಗೆ ಬಂದಿತ್ತು. ಅಮೆರಿಕದಲ್ಲಿರುವ ಶೃತಿ ಅವರು ಪೋಷಕರ ಮನೆಯ ಸಿಸಿಟಿವಿ ಲಿಂಕ್ ಮೊಬೈಲ್ಗೆ ಕನೆಕ್ಟ್ ಮಾಡಿಕೊಂಡಿದ್ದಾರೆ. ಅವರ ಮನೆಯಲ್ಲಾಗುತ್ತಿರುವ ಆಗುಹೋಗುಗಳ ಬಗ್ಗೆ, ಮತ್ತು ಮನೆ ಬಳಿ ಬರುವವರ ಬಗ್ಗೆ ಸಿಸಿಕ್ಯಾಮೆರ ಅಲರ್ಟ್ ಮೆಸೇಜ್ ಬರುತ್ತದೆ.
ಅದರಂತೆ ದರೋಡೆಕೋರರು ಮನೆ ಬಳಿ ಬರುವ ಅಲರ್ಟ್ ಮೆಸೇಜ್ ಸಿಕ್ಕಿದೆ. ಆಗ ಅವರು ಮೊಬೈಲ್ ವೀಕ್ಷಿಸಿದಾಗ ಚಡ್ಡಿಗ್ಯಾಂಗ್ ದರೋಡೆಗೆ ಸ್ಕೆಚ್ ಹಾಕುತ್ತಿರುವುದು ಕಂಡುಬಂದಿದೆ. ನಂತರ ತಂದೆಗೆ ಕರೆ ಮಾಡಿ ತಂದೆಗೆ ಎಚ್ಚರಿಕೆ ಕೊಟ್ಟಿದ್ದಾರೆ. ತಂತ್ರಜ್ಞಾನದಿಂದಾಗಿ ಮುಂದಾಗುವ ಭಾರಿ ಅವಘಡವನ್ನು ಶೃತಿ ತಪ್ಪಿಸಿದ್ದಾರೆ. ವೃದ್ಧ ದಂಪತಿ ಸುರಕ್ಷಿತವಾಗಿದ್ದಾರೆ.
ನಿವೃತ್ತ ಇಂಜಿನಿಯರ್ ಹನುಮಂತಗೌಡ ಸಂಕಪ್ಪನವರ್ ಮತ್ತು ಅವರ ಪತ್ನಿ ಮಾತ್ರ ಅವರ ಮನೆಯಲ್ಲಿ ಇದ್ದರು. ಇದನ್ನೇ ಬಂಡವಾಳ ಮಾಡಿಕೊಂಡ ಚಡ್ಡಿಗ್ಯಾಂಗ್ ಯಾರಿಲ್ಲದ ಸಮಯ ನೋಡಿ ದರೋಡೆ ಮಾಡಲು ಬಂದಿತ್ತು. ಶೃತಿ ಅಮೆರಿಕದಿಂದ ಮನೆಯ ಸಿಸಿ ಕ್ಯಾಮೆರಾವನ್ನು ಮೊಬೈಲ್ನಲ್ಲಿ ನೋಡಿ ತಕ್ಷಣ ಅವರು ತಂದೆಗೆ ಫೋನ್ ಮಾಡಿ ಈ ಬಗ್ಗೆ ಎಚ್ಚರಿಸಿದರು. ಹನುಮಂತಗೌಡರು ಏನು ತಿಳಿಯದ ಹಾಗೆ ಮೆಲ್ಲಗೆ ಮನೆಯ ಬಾಗಿಲು ತೆರೆದಾಗ ಕಳ್ಳರು ಓಡಿಹೋದರು.
ತಂತ್ರಜ್ಞಾನ ಇಷ್ಟೊಂದು ಮುಂದುವರೆದಿದ್ದರಿಂದ ಮನೆ ದರೋಡೆಯೊಂದು ತಪ್ಪಿದಂತಾಗಿದೆ. ತಂತ್ರಜ್ಞಾನವು ಹೇಗೆ ಸಹಾಯ ಮಾಡುತ್ತದೆ ಎಂಬುದಕ್ಕೆ ಇದು ಒಂದು ಉದಾಹರಣೆ. ಮನೆ ಸಿಸಿ ಕ್ಯಾಮೆರಾ ಲಿಂಕ್ ಗಳು ತಮ್ಮ ಮೊಬೈಲ್ನಲ್ಲಿ ಅಳವಡಿಸಿಕೊಂಡಿದ್ದರಿಂದ ಕಳ್ಳರು ಮನೆಯೊಳಗೆ ನುಗ್ಗಿರುವುದು ಕಂಡುಬಂದಿದೆ ಎಂದು ಅಮೆರಿಕದಲ್ಲಿರುವ ಶೃತಿ ಹೇಳಿದ್ದಾರೆ.