ನಾನು ಏಕೆ ನಿವೃತ್ತಿ ಪಡೆಯಬೇಕು? ನಿವೃತ್ತಿ ತೆಗೆದುಕೊಂಡರೆ ಯಾರಿಗೆ ಒಳೆಯದಾಗುತ್ತೆ..? ಮೊಹಮ್ಮದ್ ಶಮಿ ಪ್ರಶ್ನೆ

ಮುಂಬೈ: "ನಾನು ನಿವೃತ್ತಿ ತೆಗೆದುಕೊಂಡರೆ ಯಾರ ಜೀವನ ಚೆನ್ನಾಗಿ ಆಗುತ್ತದೆ? ನಾನು ಯಾರ ಜೀವನದಲ್ಲಿ ಕಲ್ಲು ಆಗಿದ್ದೇನೆ ಅಂತ ನನಗೆ ನಿವೃತ್ತಿ ತೆಗೆದುಕೊಳ್ಳಬೇಕು ಅಂತಿದ್ದೀರಿ?'' ಇದು ತಮ್ಮ ನಿವೃತ್ತಿಯ ಕುರಿತು ಊಹಾಪೋಹಗಳನ್ನು ಹಬ್ಬಿಸುತ್ತಿರುವ ಟೀಕಾಕಾರರಿಗೆ ಭಾರತದ ವೇಗದ ಬೌಲರ್ ಮೊಹಮ್ಮದ್ ಶಮಿ ನೀಡಿದ ತಿರುಗೇಟು.

ಚೇತೇಶ್ವರ ಪೂಜಾರ, ರವಿಚಂದ್ರನ್ ಅಶ್ವಿನ್ ಸೇರಿದಂತೆ ಭಾರತೀಯ ಕ್ರಿಕೆಟ್‌ನ ಹಲವು ಹಿರಿಯ ಆಟಗಾರರು ಸಾಲುಸಾಲಾಗಿ ನಿವೃತ್ತಿ ಘೋಷಿಸುತ್ತಿರುವ ಈ ಸಂದರ್ಭಧಲ್ಲಿ ತಮ್ಮ ನಿವೃತ್ತಿಯ ಬಗೆಗಿನ ವದಂತಿಗಳನ್ನು ಅವರು ತಳ್ಳಿಹಾಕಿದ್ದಾರೆ. ಈ ಬಗ್ಗೆ ನ್ಯೂಸ್ 24ಕ್ಕೆ ನೀರುವ ಸಂದರ್ಶನದಲ್ಲಿ ಅವರು 2027ರ ಏಕದಿನ ವಿಶ್ವಕಪ್ ಗೆಲ್ಲುವುದು ನನ್ನ ಗುರಿಯಾಗಿದ್ದು ಸದ್ಯಕ್ಕೆ ನಿವೃತ್ತಿಯಾಗುವ ಯಾವುದೇ ಆಲೋಚನೆ ಹೊಂದಿಲ್ಲ ಎಂದು ಸ್ಪಷ್ಟಪಡಿಸಿದರು. ಏಷ್ಯಾ ಕಪ್ ಗೆ ಅವರನ್ನು ಆಯ್ಕೆ ಮಾಡದಿರುವುದು ತೀವ್ರ ಟೀಕೆಗೆ ಗುರಿಯಾಗಿತ್ತು.

2023ರ ವಿಶ್ವಕಪ್ ಫೈನಲ್ ಬಳಿಕ ಗಾಯದ ಸಮಸ್ಯೆಗೀಡಾದ ಅವರು ಸುಮಾರು ಒಂದುೂವರೆ ವರ್ಷಗಳ ವಿಶ್ರಾಂತಿಯಲ್ಲಿದ್ದು ಚಿಕಿತ್ಸೆ ಪಡೆಯುತ್ತಿದ್ದರು. 2024ರ ವರ್ಷಾಂತ್ಯದಲ್ಲಿ ನಡೆದ ಬಾರ್ಡರ್ ಗವಾಸ್ಕರ್ ಟ್ರೋಫಿಗೆ ಅವರನ್ನು ತಂಡವನ್ನು ಸೇರಬಹುದು ಎಂಬ ನಿರೀಕ್ಷೆ ಇತ್ತಾದರೂ ಸಾಧ್ಯವಾಗಲಿಲ್ಲ. ಬಳಿಕ ಇಂಗ್ಲೆಂಡ್ ವಿರುದ್ಧ ನಡೆದ ವೈಟ್ ಬಾಲ್ ಸರಣಿ ಮತ್ತು ಐಸಿಸಿ ಚಾಂಪಿಯನ್ಸ್ ಟ್ರೋಫಿಗಳಲ್ಲಿ ಕಾಣಿಸಿಕೊಂಡ ಅವರು ಉತ್ತಮ ಪ್ರದರ್ಶನವನ್ನೇ ನೀಡಿದರು. ಆದರೆ ಐಪಿಏಲ್ ನಲ್ಲಿ ಸನ್ ರೈಸರ್ಸ್ ಪರ ಆಡುತ್ತಿರುವ ಅವರು ಬೌಲಿಂಗ್ ಉನ್ನತ ದರ್ಜೆಯಲ್ಲಿ ಇರಲಿಲ್ಲ. ಹಾಗಾಗಿ ಇಂಗ್ಲೆಂಡ್‌ನಲ್ಲಿ ನಡೆದ ಆ್ಯಂಡರ್ಸನ್-ತೆಂಡೂಲ್ಕರ್ ಟ್ರೋಫಿ ಟೆಸ್ಟ್ ಸರಣಿಗೆ ಅವರನ್ನು ಪರಿಗಣಿಸಿರಲಿಲ್ಲ. ಅಲ್ಲದೆ ಮುಂಬರುವ ಏಷ್ಯಾ ಕಪ್‌ಗೆ ಭಾರತ ತಂಡದಿಂದ ಕೈಬಿಡಲಾಗಿದೆ. ಆದರೂ, ತಾನು ಆಡಲು ಪ್ರೇರಣೆ ಸಿಗದ ದಿನದವರೆಗೂ ಆಡುವುದನ್ನು ಮುಂದುವರಿಸುವುದಾಗಿ 34 ವರ್ಷದ ಶಮಿ ಹೇಳಿದರು.

ನನಗೆ ಬೇಸರವಾದ ದಿನ ನಾನಾಗಿಯೇ ಬಿಟ್ಟು ಹೋಗುತ್ತೇನೆ

"ಯಾರಿಗಾದರೂ ಸಮಸ್ಯೆ ಇದ್ದರೆ, ನನ್ನ ಬಳಿ ಹೇಳಿ. ನನಗೆ ಬೇಸರವಾದ ದಿನ ನಾನಾಗಿಯೇ ಬಿಟ್ಟು ಹೋಗುತ್ತೇನೆ. ನೀವು ನನ್ನನ್ನು ಆಯ್ಕೆ ಮಾಡದಿದ್ದರೆ, ಆಡಿಸದಿದ್ದರೆ ನನಗೆ ಚಿಂತೆ ಇಲ್ಲ. ಆದರೆ ನಾನು ಕಷ್ಟಪಟ್ಟು ಕೆಲಸ ಮಾಡುವುದನ್ನು ಮುಂದುವರಿಸುತ್ತೇನೆ . ಒಂದು ವೇಳೆ ನೀವು ನನ್ನನ್ನು ಅಂತಾರಾಷ್ಟ್ರೀಯ ಪಂದ್ಯಗಳಿಗೆ ಆಯ್ಕೆ ಮಾಡದಿದ್ದರೆ, ನಾನು ದೇಶೀಯ ಕ್ರಿಕೆಟ್ ಆಡುತ್ತೇನೆ. ನಾನು ಎಲ್ಲೋ ಒಂದು ಕಡೆ ಖಂಡಿತ ಆಡುತ್ತಲೇ ಇರುತ್ತೇನೆ ಎಂದರು. ಇನ್ನು ನೀವು ಬೇಸರಗೊಂಡಾಗ ಮಾತ್ರ ನಿವೃತ್ತಿ ಮತ್ತು ಅಂತಹ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತೀರಿ. ಟೆಸ್ಟ್ ಪಂದ್ಯ ಆಡುವ ಸಲುವಾಗಿ ಬೆಳಿಗ್ಗೆ 7 ಗಂಟೆಗೆ ಏಳಲು ಇಷ್ಟವಿಲ್ಲದಿದ್ದಾಗ ತೆಗೆದುಕೊಳ್ಳುತ್ತೀರಿ. ಆದರೆ ಅದು ನನಗೆ ಈಗ ಅಲ್ಲ. ನೀವು ಹೇಳಿದರೆ ನಾನು 5 ಗಂಟೆಗೆ ಏಳುತ್ತೇನೆ" ಎಂದು ಅವರು ಹೇಳಿದರು.

ವಿಶ್ವಕಪ್ ಆಡಿ ಗೆಲ್ಲುವುದೇ ನನ್ನ ಗುರಿ 

"ಈಗ ನನಗೆ ಉಳಿದಿರುವ ಕನಸು ಒಂದೇ, ಅದು ಏಕದಿನ ವಿಶ್ವಕಪ್ ಗೆಲ್ಲುವುದು. 2023 ರಲ್ಲಿ ನಾವು ತುಂಬಾ ಸಮೀಪ ಬಂದಿದ್ದೆವು. ನಮಗೆ ಒಂದು ರೀತಿಯ ಭಾವನೆ ಇತ್ತು, ಆದರೆ ನಾಕೌಟ್ ಹಂತದಲ್ಲಿ ಭಯ ಸಹ ಇತ್ತು. ಅಭಿಮಾನಿಗಳ ಹುರುಪು ಮತ್ತು ನಂಬಿಕೆ ನಮ್ಮನ್ನು ಪ್ರೇರೇಪಿಸಿತು. ಬಹುಶಃ ಅದು ನನ್ನ ಅದೃಷ್ಟದಲ್ಲಿ ಇರಲಿಲ್ಲ, ಆದರೆ ನಾನು 2027 ರಲ್ಲಿ ಅಲ್ಲಿರಲು ಬಯಸುತ್ತೇನೆ" ಎಂದು ಶಮಿ ತನ್ನ ಇರಾದೆಯನ್ನು ಸ್ಪಷ್ಟಪಡಿಸಿದರು.

ಇನ್ನು ತಮ್ಮ ಫಿಟ್‌ನೆಸ್ ವಿಚಾರವಾಗಿಯೂ ಮಾತನಾಡಿದ ಶಮಿ, ತೂಕ ಇಳಿಸಿಕೊಳ್ಳಲು, ಲಯವನ್ನು ಕಂಡುಕೊಳ್ಳಲು ಮತ್ತು ದೀರ್ಘ ಸ್ಪೆಲ್‌ಗಳಿಗೆ ತಯಾರಿ ನಡೆಸಲು ಕಳೆದ ಎರಡು ತಿಂಗಳಿಂದ ಶ್ರಮ ವಹಿಸಿ ಕೆಲಸ ಮಾಡಿದ್ದೇನೆ ಎಂದು ಹೇಳಿದ್ದಾರೆ. "ದೇವರ ದಯೆಯಿಂದ ಈಗ ನನ್ನ ಫಿಟ್ನೆಸ್ ಉತ್ತಮವಾಗಿದೆ. ನಾನು ಅಗತ್ಯ ತರಬೇತಿ ಪಡೆದಿದ್ದೇನೆ, ನನ್ನ ಕೌಶಲ್ಯಗಳನ್ನು ಹೆಚ್ಚಿಸಿಕೊಂಡಿದ್ದೇನೆ, ಬ್ಯಾಟಿಂಗ್, ಫೀಲ್ಡಿಂಗ್, ಜಿಮ್ ವರ್ಕ್ ಎಲ್ಲವನ್ನೂ ಅಭ್ಯಾಸ ಮಾಡಿದ್ದೇನೆ. ನನ್ನ ಗಮನ ಲಯವನ್ನು ಕಂಡುಕೊಳ್ಳುವುದು ಮತ್ತು ದೀರ್ಘ ಸ್ಪೆಲ್‌ಗಳನ್ನು ಮಾಡುವುದು" ಎಂದು ಅವರು ವಿವರಿಸಿದರು. ಏತನ್ಮಧ್ಯೆ ಅವರ ವೈಯಕ್ತಿಕ ಜೀವನದಲ್ಲಿ ಎದ್ದ ಬಿರುಗಾಳಿ ಈವರೆಗೂ ತಣ್ಣಗಾಗಿಲ್ಲ. ಅವರ ಮಾಜಿ ಪತ್ನಿ ಹಸೀನ್ ಜಹಾನ್ ಈಗಲೂ ಅವರನ್ನು ಟೀಕೆ ಮಾಡುವುದನ್ನು ಬಿಟ್ಟಿಲ್ಲ.