ದೇಶದ ಮೊದಲ ಜಲಸುರಂಗ ಮೆಟ್ರೋ ಮಾರ್ಗಕ್ಕೆ ಚಾಲನೆ ನೀಡಿದ ಪ್ರಧಾನಿ ಮೋದಿ: ಇದರ ವಿಶೇಷತೆಯನ್ನೊಮ್ಮೆ ನೋಡಿ...

ಕೋಲ್ಕತಾ: ಪಶ್ಚಿಮ ಬಂಗಾಳದ ಕೋಲ್ಕತಾದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಮೊದಲ ಜಲ ಸುರಂಗ ಮೆಟ್ರೋ ಮಾರ್ಗವನ್ನು ಬುಧವಾರ ಉದ್ಘಾಟಿಸುವ ಮೂಲಕ ಮೂಲಸೌಕರ್ಯ ಅಭಿವೃದ್ಧಿಯ ನಿಟ್ಟಿನಲ್ಲಿ ದೇಶದ ಸಾಧನೆಯನ್ನು ಬಿಂಬಿಸುವ ಮೈಲುಗಲ್ಲಿನ ಯೋಜನೆಯಾಗಿದೆ.

ಇದೇ ಸಂದರ್ಭದಲ್ಲಿ ಅವರು ಸುಮಾರು 15,400 ಕೋಟಿ ರೂ ಮೊತ್ತದ ಬಹು ಸಂಪರ್ಕ ಯೋಜನೆಗಳಿಗೆ ಶಂಕುಸ್ಥಾಪನೆ ನೆರವೇರಿಸಿದರು.

ಕವಿ ಸುಭಾಷ್ ಮೆಟ್ರೋ, ಮಾಜೆರ್ಹಾತ್ ಮೆಟ್ರೋ, ಕೊಚ್ಚಿ ಮೆಟ್ರೋ, ಆಗ್ರಾ ಮೆಟ್ರೋ, ಮೀರತ್ ಆರ್‌ಆರ್‌ಟಿಎಸ್ ಸೆಕ್ಷನ್, ಪುಣೆ ಮೆಟ್ರೋ ಮತ್ತು ಕೋಲ್ಕತಾ ಮೆಟ್ರೋದ ಎಸ್ಪ್ಲಾನಾಡೆ ಸೆಕ್ಷನ್‌ನ ಕಾರ್ಯಾಚರಣೆ ಸೇರಿದಂತೆ ಮೆಟ್ರೋ ರೈಲ್ವೆಯ ವಿವಿಧ ಸೇವೆಗಳಿಗೆ ಪ್ರಧಾನಿ ಮೋದಿ ಚಾಲನೆ ನೀಡಿದರು.

ಅನೇಕ ಶಾಲಾ ಮಕ್ಕಳ ಜತೆ ಪ್ರಧಾನಿ ನರೇಂದ್ರ ಮೋದಿ ಅವರು ನೀರಿನ ಅಡಿಯ ಮೆಟ್ರೋದಲ್ಲಿ ಮೊದಲ ಪ್ರಯಾಣದ ಅನುಭವ ಪಡೆದರು. ಮೆಟ್ರೋ ನಿಲ್ದಾಣ ಆವರಣದಲ್ಲಿ ತಮ್ಮ ಪಕ್ಕ ಕುಳಿತಿದ್ದ ಹಾಗೂ ಸಮೀಪದಲ್ಲಿ ನಿಂತಿದ್ದ ಶಾಲಾ ಮಕ್ಕಳ ಜತೆ ಮೋದಿ ಸಂವಾದ ನಡೆಸಿದರು.

ಪಶ್ಚಿಮ ಬಂಗಾಳದ ಬಿಜೆಪಿ ಅಧ್ಯಕ್ಷ ಸುಕಾಂತ ಮಜುಂದಾರ್ ಮತ್ತು ವಿಧಾನಸಭೆಯಲ್ಲಿನ ವಿರೋಧ ಪಕ್ಷದ ನಾಯಕ ಸುವೇಂದು ಅಧಿಕಾರಿ, ಮೆಟ್ರೋದ ಹಲವು ಅಧಿಕಾರಿಗಳ ಜತೆ ಪ್ರಧಾನಿ ಮೋದಿ ಅವರಿಗೆ ಸಾಥ್ ನೀಡಿದರು.

2023ರ ಏಪ್ರಿಲ್‌ನಲ್ಲಿ ಜಲ ಸುರಂಗ ಮಾರ್ಗದಲ್ಲಿ ಪರೀಕ್ಷಾರ್ಥವಾಗಿ ಮೊದಲ ಬಾರಿ ಮೆಟ್ರೋ ರೈಲು ಓಡಿಸುವ ಮೂಲಕ ಕೋಲ್ಕತಾ ಮೆಟ್ರೋ ಇತಿಹಾಸ ಸೃಷ್ಟಿಸಿತ್ತು. ಇದಾಗಿ ಒಂದು ವರ್ಷಕ್ಕೂ ಕಡಿಮೆ ಅವಧಿಯಲ್ಲಿ ಈ ಮಾರ್ಗ ಅಧಿಕೃತವಾಗಿ ಲೋಕಾರ್ಪಣೆಗೊಂಡಿದೆ.

ಎಸ್ಪ್ಲಾನಾಡೆ ಮತ್ತು ಸೀಲ್ದಾಹ್ ನಡುವಿನ ಪೂರ್ವ- ಪಶ್ಚಿಮ ಜೋಡಣೆಯ ಭಾಗವು ಇನ್ನೂ ನಿರ್ಮಾಣ ಹಂತದಲ್ಲಿದೆ. ಆದರೆ ಸಾಲ್ಟ್ ಲೇಕ್ ಸೆಕ್ಷನ್ 5 ರಿಂದ ಸೀಲ್ದಾಹ್ ಭಾಗ ಈಗಾಗಲೇ ಕಾರ್ಯಾಚರಣೆಯಲ್ಲಿದೆ. ಆಟೋಮ್ಯಾಟಿಕ್ ಟ್ರೈನ್ ಆಪರೇಷನ್ (ಎಟಿಒ) ಎಂಬ ವ್ಯವಸ್ಥೆಯನ್ನು ಮೆಟ್ರೋ ಬಳಸುತ್ತದೆ. ಚಾಲಕ ಬಟ್ ಒತ್ತಿದಾಗ ರೈಲು ಸ್ವಯಂ ಚಾಲಿತವಾಗಿ ಮುಂದಿನ ನಿಲ್ದಾಣದ ಕಡೆಗೆ ಸಾಗುತ್ತದೆ.

ಪೂರ್ವ- ಪಶ್ಚಿಮ ಮೆಟ್ರೋದ ಒಟ್ಟು 16.6 ಕಿಮೀ ಮಾರ್ಗದಲ್ಲಿ, ಹೂಗ್ಲಿ ನದಿ ಅಡಿಯ ಸುರಂಗ ಸೇರಿದಂತೆ 10.8 ಕಿಮೀ ಸುರಂಗ ಮಾರ್ಗದಲ್ಲಿದೆ. ಉಳಿದ ಭಾಗ ನೆಲದ ಮೇಲಿದೆ.

ಸಾಲ್ಟ್ ಲೇಕ್ ಸೆಕ್ಟರ್ 5 ಮತ್ತು ಹೌರಾ ಮೈದಾನದ ನಡುವಿನ ಪೂರ್ವ- ಪಶ್ಚಿಮ ಮಾರ್ಗದ ಸಂಪೂರ್ಣ ವಾಣಿಜ್ಯಾತ್ಮಕ ಕಾರ್ಯಾಚರಣೆಯನ್ನು ಜೂನ್ ಅಥವಾ ಜುಲೈ ತಿಂಗಳ ವೇಳೆಗೆ ಆರಂಭಿಸಲು ಕೋಲ್ಕತಾ ಮೆಟ್ರೋ ಉದ್ದೇಶಿಸಿದೆ.

ಪಶ್ಚಿಮ ಬಂಗಾಳದ ರಾಜಧಾನಿಯಲ್ಲಿನ ಅವಳಿ ನಗರಗಳಾದ ಹೌರಾ ಮತ್ತು ಸಾಲ್ಟ್ ಲೇಕ್ ಅನ್ನು ಮೆಟ್ರೋ ಸೇವೆ ಸಂಪರ್ಕಿಸುತ್ತದೆ. ಆರು ನಿಲ್ದಾಣಗಳ ಪೈಕಿ ಮೂರು ನೀರಿನ ಅಡಿಯಲ್ಲಿವೆ. ಹೂಗ್ಲಿ ನದಿ ಅಡಿಯಲ್ಲಿನ 520 ಮೀಟರ್ ದೂರವನ್ನು ರೈಲು ಕೇವಲ 45 ಸೆಕೆಂಡುಗಳಲ್ಲಿ ಕ್ರಮಿಸುವ ನಿರೀಕ್ಷೆ ಇದೆ.

ಅಂಡರ್ ವಾಟರ್ ಸೇವೆಯು ಕೋಲ್ಕತಾ ಮೆಟ್ರೋದ ಪೂರ್ವ- ಪಶ್ಚಿಮ ಕಾರಿಡಾರ್‌ನ 4.8 ಕಿಮೀ ಉದ್ದದ ಹೌರಾ ಮೈದಾನ್- ಎಸ್ಪ್ಲಾನಾಡೆ ಸೆಕ್ಷನ್‌ನ ಭಾಗವಾಗಿದೆ. ಹೂಗ್ಲಿ ನದಿಯ ಅಡಿಯಲ್ಲಿ 16.6 ಕಿಮೀ ಅಂತರವನ್ನು ಇದು ವ್ಯಾಪಿಸಿದೆ.