ಪ್ರತಿ ಕುಟುಂಬವು ಮೂರು ಮಕ್ಕಳನ್ನು ಹೊಂದಬೇಕೆಂಬ RSS ಮುಖ್ಯಸ್ಥ ಭಾಗವತ್ ಹೇಳಿಕೆಗೆ ಓವೈಸಿ ತಿರುಗೇಟು

ಹೈದರಾಬಾದ್: ಪ್ರತಿ ಕುಟುಂಬವು ಮೂರು ಮಕ್ಕಳನ್ನು ಹೊಂದಬೇಕು ಎಂದು ಕರೆ ನೀಡಿರುವ ಆರ್ ಎಸ್ ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರ ವಿರುದ್ಧ ಆಲ್ ಇಂಡಿಯಾ ಮಜ್ಲಿಸ್-ಎ-ಇತ್ತೆಹಾದುಲ್ ಮುಸ್ಲಿಮೀನ್ (ಎಐಎಂಐಎಂ) ಮುಖ್ಯಸ್ಥ ಅಸಾದುದ್ದೀನ್ ಓವೈಸಿ ತಿರುಗೇಟು ನೀಡಿದ್ದಾರೆ. 

ಹೈದರಾಬಾದ್ ನಲ್ಲಿ ಮಾತನಾಡಿದ ಓವೈಸಿ, “ಮೂರು ಮಕ್ಕಳನ್ನು ಮಾಡಿಕೊಳ್ಳುವ ದಂಪತಿಗೇನಾದರೂ ಮೋಹನ್ ಭಾಗವತ್ ಅವರು ನಗದು ಪುರಸ್ಕಾರ ಕೊಡುತ್ತಾರೆಯೇ ಎಂದು ಪ್ರಶ್ನಿಸಿದ್ದಾರೆ. “ಹಾಗೆ ಮೂರನೇ ಮಗು ಮಾಡಿಕೊಳ್ಳುವ ದಂಪತಿಗೆ 1,500 ರೂ. ಕೊಡುತ್ತಾರೇನೋ. ಏಕೆಂದರೆ, ಇದಕ್ಕಾಗಿ ಒಂದು ಗ್ಯಾರಂಟಿಯನ್ನು ಪ್ರಕಟಿಸಿದರೆ ಚೆನ್ನ. ಹೇಗಿದ್ದರೂ ಮಹಾರಾಷ್ಟ್ರದ ಸಿಎಂ ಆಗಿ ತನ್ನ ಆಪ್ತರಲ್ಲೊಬ್ಬರನ್ನು ಮಾಡಲು ಮೋಹನ್ ಭಾಗವತ್ ತೆರೆಮರೆಯಲ್ಲಿ ಪ್ರಯತ್ನಿಸುತ್ತಿದ್ದಾರಂತೆ. ಆ ಹೊಸ ಸಿಎಂ ಮೂಲಕವೇ ಮೂರನೇ ಮಗು ಮಾಡಿಕೊಳ್ಳುವವರಿಗೆ ನಗದು ಪುರಸ್ಕಾರ ನೀಡುವ ಸ್ಕೀಂ ಮಾಡಲಿ’’ ಎಂದು ಕಾಲೆಳೆದಿದ್ದಾರೆ.

ಆರ್ ಜೆಡಿಯಿಂದ ಅಸಮಾಧಾನ

ಮೋಹನ್ ಭಾಗವತ್ ಅವರ ಈ ಹೇಳಿಕೆ ರಾಜಕೀಯ ವಲಯದಲ್ಲಿ ಅಸಮಾಧಾನವನ್ನು ಹೊತ್ತಿಸಿದೆ. ಮೋಹನ್ ಭಾಗವತ್ ಅವರ ಹೇಳಿಕೆಯನ್ನು ಟೀಕಿಸಿರುವ ರಾಷ್ಟ್ರೀಯ ಜನತಾದಳದ ವಕ್ತಾರ ಮೃತ್ಯುಂಜಯ ತಿವಾರಿಯವರು, “ಬಿಜೆಪಿ ನಾಯಕರು ಜನಸಂಖ್ಯಾ ನಿಯಂತ್ರಣದ ಬಗ್ಗೆ ಮಾತನಾಡಿದರೆ, ಆರೆಸ್ಸೆಸ್‌ ಮುಖ್ಯಸ್ಥರು ಕುಟುಂಬಗಳು ಹೆಚ್ಚು ಮಕ್ಕಳನ್ನು ಹೊಂದಬೇಕು ಎಂದು ಸಲಹೆ ನೀಡುತ್ತಾರೆ. ಇಂಥ ವಿರೋಧಾಭಾಸದ ಹೇಳಿಕೆಗಳು ನಿಲ್ಲಬೇಕು’’ ಎಂದಿದ್ದಾರೆ.

ಮೋಹನ್ ಭಾಗವತ್ ಹೇಳಿದ್ದೇನು?

ನಾಗ್ಪುರದಲ್ಲಿರುವ ಆರ್ ಎಸ್ಎಸ್ ಕೇಂದ್ರ ಕಚೇರಿಯಲ್ಲಿ ನಡೆದ ಸಮಾರಂಭವೊಂದರಲ್ಲಿ ಮಾತನಾಡಿದ್ದ ಮೋಹನ್ ಭಾಗವತ್, ‘‘ಜನಸಂಖ್ಯಾ ಬೆಳವಣಿಗೆಯ ದರ 2.1%ಕ್ಕಿಂತ ಕಡಿಮೆಯಾದರೆ ಯಾರ ಪ್ರಯತ್ನವಿಲ್ಲದೇ ಸಮಾಜ ಸ್ವಯಂ ವಿನಾಶಗೊಳ್ಳುತ್ತದೆ ಎಂದು ಜನಸಂಖ್ಯಾ ತಜ್ಞರು ಹೇಳುತ್ತಾರೆ. ಹಾಗಾಗಿ ಸಮಾಜದ ವಿನಾಶ ತಪ್ಪಿಸಲು ಪ್ರತಿ ಕುಟುಂಬಗಳು ಕನಿಷ್ಠ ಮೂರು ಮಕ್ಕಳನ್ನಾದರೂ ಹೊಂದಬೇಕು,’’ ಎಂದು ಆರೆಸ್ಸೆಸ್‌ ಮುಖ್ಯಸ್ಥ ಮೋಹನ್‌ ಭಾಗವತ್‌ ಪ್ರತಿಪಾದಿಸಿದ್ದಾರೆ. ಭಾಗವತ್‌ ಅವರ ಹೇಳಿಕೆಗೆ ಸಾಮಾಜಿಕ ಜಾಲತಾಣಗಳಲ್ಲಿಪರ-ವಿರೋಧ ಚರ್ಚೆ ಶುರುವಾಗಿದೆ.

ಮಹಾರಾಷ್ಟ್ರದ ನಾಗ್ಪುರದಲ್ಲಿನಡೆದ ‘ಕಥಲೆ ಕುಲ್‌’ ಸಮ್ಮೇಳನ ಉದ್ದೇಶಿಸಿ ಭಾನುವಾರ ಮಾತನಾಡಿದ ಭಾಗವತ್‌, ‘‘ಕುಟುಂಬ ಎಂದರೆ ಸಮಾಜದ ಅಂಗ. ಪ್ರತಿ ಕುಟುಂಬಗಳು ಘಟಕಗಳಿದ್ದಂತೆ. ಜನಸಂಖ್ಯಾ ವಿಜ್ಞಾನದಲ್ಲಿಹೇಳಿದಂತೆ ಪ್ರತಿಯೊಂದು ಕುಟುಂಬವೂ ಕನಿಷ್ಠ ಮೂರು ಮಕ್ಕಳನ್ನಾದರೂ ಹೆತ್ತು ಸಮಾಜದ ವಿನಾಶ ತಡೆಯಬೇಕು,’’ ಎಂದರು.

‘‘ಕಾಲಾನುಕ್ರಮದಲ್ಲಿಕುಸಿಯುತ್ತಿರುವ ಜನಸಂಖ್ಯಾ ಪ್ರಮಾಣ ಭವಿಷ್ಯದ ದೃಷ್ಟಿಯಿಂದ ಅಪಾಯಕಾರಿ,’’ ಎಂದಿರುವ ಅವರು, ‘‘1998 ಅಥವಾ 2002ರ ಹೊತ್ತಿಗೆ ರೂಪಿಸಲಾದ ಭಾರತದ ಜನಸಂಖ್ಯಾ ನೀತಿಯು ಯಾವುದೇ ಸಮುದಾಯದ ಜನಸಂಖ್ಯಾ ಬೆಳವಣಿಗೆಯ ದರವು 2.1%ಕ್ಕಿಂತ ಕಡಿಮೆ ಇರಬಾರದು ಎಂದು ಹೇಳುತ್ತದೆ. ಪ್ರತಿ ಕುಟುಂಬವು ಕನಿಷ್ಠ ಮೂರು ಮಕ್ಕಳನ್ನು ಹೊಂದಬೇಕು. ಜನಸಂಖ್ಯಾ ವಿಜ್ಞಾನವೂ ಇದನ್ನೇ ಹೇಳುತ್ತದೆ,’’ ಎಂದು ಹೇಳಿದರು.